ក្អែកពាំផ្លែល្វារាយគ្រប់ស្រុក
ខ្មៅ៖ ពណ៌ខ្មៅតំណាងឱ្យសភាវៈអាក្រក់ សាហាវ ឃោឃៅ ព្រៃផ្សៃ ឬ បែកឆ្វេង។
ក្អែក៖ តំណាងឱ្យលទ្ធិដឹកនាំ របបគ្រប់គ្រង មនោគមវិជ្ជា ឬ និន្នាការនយោបាយ។
ក្អែកខ្មៅ៖ តំណាងឱ្យពួកអ្នកប្រកាន់និន្នាការនយោបាយ(ឆ្វេង)សាធារណរដ្ឋប្រជាមានិតសង្គមនិយម ឬ គេហៅថា(កុម្មុយនិស្ត)ដោយផ្អែកលើកម្លាំងបដិវត្តន៍របស់ពួកវណ្ណអធនជាមូលដ្ឋាន។ ពួកគេជាប្រជាជនក្រីក្រតោកយ៉ាកដែលកើតចេញពីត្រកូលក្រខ្សត់ ដូចពួកកម្មករលីសែងកសិករគ្មានដីធ្លី ឬ ពួកអ្នកស៊ីឈ្នួលបម្រើតាមគេហដ្ឋាន និង ពួកចោរព្រៃដើរលួចប្លន់គោ ក្របី របស់ប្រជាជនរស់នៅតាមជនបទខ្វះការរៀនសូត្រមានកម្រិតយល់ដឹងទាបជាទីបំផុត។
ពាំផ្លែល្វា៖ ផ្លែល្វាជាផ្លែឈើម៉្យាង ដែលមានសម្បកខាងក្រៅមានពណ៌ភ្លឺស្អាតល្អគួរឱ្យជាទីបា្រថ្នាចង់បាន និងគួរឱ្យជាទីពេញចិត្តរបស់អ្នកផងទាំងពួងគ្រប់ៗគ្នា។ ប៉ុន្តែផ្នែកខាងក្នុងរបស់ផ្លែឈើនេះវិញមានភាពស្មោកគ្រោក និងពោរពេញទៅដោយសត្វមមុងគួឱ្យខ្ពើមរអើមពន់ពេក។ យ៉ាងណាម៉ិញទ្រឹស្តី របស់ពួកវណ្ណអធននៃរបបកុម្មុយនិស្តល្អបានតែសម្បកក្រៅ បើការអនុវត្តន៍វិញវាស្អុយជាងលាមកទៅទៀត។ជាទ្រឹស្តីមួយដែលមានលក្ខណៈផ្ទុយអំពីច្បាប់ធម្មជាតិដោយបង្ខំអ្នកចេះដឹងឱ្យទៅធ្វើស្រែចំការ លីសែង បែជាប្រើពួកកម្មករ អ្នកស្រែចំការ ឱ្យធ្វើជាអ្នកដឹកនាំ(យកក្បាលធ្វើជាជើងដៃ យកជើងដៃធ្វើជាក្បាល)។
រាយគ្រប់ស្រុក៖ ការដើឃោសនាមហាជនដើម្បីផ្សព្វផ្សាយមនោគមវិជ្ជារបស់ពួកកុម្មុយនិស្តនៅតាមជនបទដាច់ស្រយ៉ាលឱ្យពួកអ្នកស្រែ អ្នកចំការ និងពួកចោរព្រៃរស់នៅតាមជាយដែន។ សូម្បី នៅតាមទីប្រជុំជន ខេត្រ ក្រុងវិញក៏ពួកកុម្មុយនិស្តដើរផ្សព្វផ្សាយមនោគមវិជ្ជារបស់គេដល់ពួកកម្មកររោងចក្រ កម្មករលីសែងតាមកំពង់ផែ ឬ តាមទីដ្ឋានសំណង់ឯកជន ឬ សំណង់រដ្ឋ(រាយគ្រប់ស្រុក)៕ គឺជាទ្រស្តីសម្រាប់បោកបញ្ឆោត បានតែចំពោះតែអ្នកមិនចេះអក្សរ អ្នកក្រខ្សត់ អ្នកអត់ប្រាជ្ញា អ្នកខកចិត្តនិងអស់សង្ឃឹមដោយសារអំពើពុករលួយ និងអយុត្តិធម៌សង្គម(=អំពើថោកទាប) របស់ពួកស្តេច ឫ ពួកសាធារណរដ្ឋសេរី។
អ្នកផងឃើញហើយខំរើសទុក៖ អ្នកផងទាំងឡាយមិនដែលស្គាល់ និងមិនដែលឃើញ របបវណ្ណអធន របស់ពួកកុម្មុយនិស្តថាវាយ៉ាងម៉េចនោះ។ ក៏នឹកស្មានថាជារបបដែលមានគតិយុត្តិធម៌ល្អបរិសុទ្ធត្រឹមត្រូវអាចជួយសង្គមឱ្យមានសមភាពភាតរភាព និងវឌ្ឍនភាពសង្គមឱ្យប្រែក្លាយជាសង្គមជឿនលឿនគ្មានអ្វីប្រៀបផ្ទឹមបានដូចពាក្យស្លោករបស់ពួកវាស្រែកថា‹‹ជ័យយោ..ជ័យយោ..ជ័យយោមហាលោតផ្លោះ មហាអស្ចារ្យជាងសម័យមហានគរ››។ ទាំងអស់គ្នាស្រី ប្រុស ចាស់ ក្មេង អ្នកកសិករ អ្នកស្រែ អ្នកចំការ ទាំងកម្មកររោងចក្រ កម្មករលីសែងសំណង់ ឬ កម្មករកំពង់ផែ និងទាំងពួកចោរព្រៃ នាំគ្នាជួយគាំទ្របម្រើបដិវត្តន៍របស់ពួកវណ្ណអធនអស់ពីកម្លាំងកាយ កម្លាំងចិត្ត។