ឃុំឆ្នុកទ្រូ
ឃុំឆ្នុកទ្រូ ជាឃុំមួយក្នុងចំណោមឃុំទាំង១០ របស់ស្រុកបរិបូណ៍ ខេត្តកំពង់ឆ្នាំង។ ប្រជាពលរដ្ឋរស់នៅលើផ្ទះបណ្តែតទឹក ក្នុងឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង ជាច្រើនគ្រួសារបានសំដែងនូវការមិនសប្បាយចិត្ត និងសំណូមពរសូមអោយអាជ្ញាធរ និងមន្ត្រីជំនាញពាក់ព័ន្ធជួយអន្តរាគមន៍ និងមានវិធានការទប់ស្កាត់ចំពោះសិប្បកម្មផលិតទូកស្មាច់ជាច្រើនកន្លែង ដែលកំពុងតែធ្វើសកម្មភាពបំពុលបរិស្ថានទឹកទន្លេយ៉ាងធ្ងន់ធ្ងរ ។ប្រជាពលរដ្ឋបានឲ្យដឹងថា សិប្បកម្មផលិតទូកស្មាច់បានបង្ហូរ និងទម្លាក់កាកសំណល់ ដែលមានសារធាតុគីមីចូលទៅក្នុងទឹក ដែលប្រជាពលរដ្ឋកំពុងតែប្រើប្រាស់ជាប្រចាំរៀងរាល់ថ្ងៃ។ប្រជាពលរដ្ឋឃុំឆ្នុកទ្រូបានសំណូមពរដ៍ទទូចជាច្រើនដងដល់អាជ្ញាធរស្រុកកំពង់លែង ខេត្តកំពង់ឆ្នាំង មេត្តាជួយចាត់វិធានការណ៍ផ្សេងៗ ចំពោះបញ្ហាបរិស្ថានលើទឹកទន្លេនេះផង ពីព្រោះសព្វថ្ងៃនេះប្រជាពលរដ្ឋ ដែលកំពុងរស់នៅលើផ្ទះបណ្តែតទឹកក្នុងឃុំឆ្នុកទ្រូ មានការព្រួយបារម្ភយ៉ាងខ្លាំងចំពោះបញ្ហាសុខភាព អនាម័យ និងជំងឺផ្សេង ដែលបានកើតជាយថាហេតុដោយសារបញ្ហាបំពុលបរិស្ថានសព្វបែបយ៉ាងនៅទីនេះ។