ចាន់ សុវ៉េត
ចាន់ សុវ៉េត (Chan Soveth) គឺជាមន្ត្រីស៊ើបអង្កេតមួយរូបនៃសមាគមអាដហុក (ADHOC) ចាប់តាំងពីឆ្នាំ១៩៩៥ រហូតដល់ឆ្នាំ២០១៤ ។ លោកបានចាប់កំណើតនៅក្នុងឆ្នាំរោង ឆ្នាំ១៩៦៣ នៅភូមិកណ្ដាល ឃុំព្រៃរ៉ៃ ស្រុកល្វាឯម ខេត្តកណ្ដាល ។ លោក ចាន់ សុវេត បានទទួលមរណភាពនៅថ្ងៃពុធ ទី១០ ខែធ្នូ ឆ្នាំ២០១៤ នៅវេលាម៉ោង ១៤ និង ៥៥ នាទី ក្នុងអាយុ ៥១ ឆ្នាំ ។
| ចាន់ សុវ៉េត | |
|---|---|
| កើត | ១៩៦៣ ភូមិកណ្ដាល ឃុំព្រៃរ៉ៃ ស្រុកល្វាឯម ខេត្តកណ្ដាល ប្រទេសកម្ពុជា |
| ស្លាប់ | ១០ ធ្នូ ២០១៤ ភ្នំពេញ |
មូលហេតុនៃការស្លាប់ | គាំងបេះដូង |
| សញ្ជាតិ | ខ្មែរ |
| ការអប់រំ | បរិញ្ញាបត្រ និង អនុបណ្ឌិតផ្នែកច្បាប់ |
| អាជីព | មន្ត្រីស៊ើបអង្កេត |
| អង្គការ | សមាគមអាដហុក |
| ត្រូវបានគេស្គាល់ថា | សកម្មជនសិទ្ធិមនុស្ស |
| ពន្ធភាព | ប៊ី សុភាព |
ជីវិត និង ការសិក្សា កែប្រែ
ជីវិត កែប្រែ
ឪពុកមានឈ្មោះ និត ពាន (បានស្លាប់នៅសម័យខ្មែរក្រហម) ម្ដាយមានឈ្មោះ ចាន់ សារឿន បានស្លាប់នៅឆ្នាំ១៩៨០ ដោយសារការស្វិតដៃជើងដោយទារុណកម្មពីសម័យខ្មែរក្រហម ។ ក្រោយឪពុកម្ដាយរបស់លោកបានលាចាកឋានទៅ លោកនិងបងប្អូនបួននាក់ទៀតបានទៅរស់នៅជាមួយម្ដាយមីងជាស្ត្រីមេម៉ាយឈ្មោះ និត ស៊ីម៉ន និងជាមួយម្ដាយធំឈ្មោះ និត អឿន ដែលពួកគាត់ទាំងពីរនាក់ជាបងប្អូនបង្កើតនឹងម្ដាយរបស់លោក ។ លោក ចាន់ សុវ៉េត មានបងប្អូនចំនួន ៥ នាក់ ហើយលោកជាកូនទីបីនៅក្នុងចំណោមបងប្អូនទាំងអស់ ។
ប្រវត្តិសិក្សា កែប្រែ
- ១៩៨០ - ១៩៨៥ ៖ ក្រោយសម័យខ្មែរក្រហម លោកបានចូលរៀននៅសាលាបឋមសិក្សាកម្ពុជៈបុត្រ ។
- ១៩៨៥ - ១៩៨៨ ៖ រៀននៅសាលាអនុវិទ្យាល័យបឹងត្របែក ។
- ១៩៨៨ - ១៩៩០ ៖ លោកបានទទួលសញ្ញាបត្រមធ្យមសិក្សាទុតិយភូមិនៅវិទ្យាល័យបឹងត្របែក ។
- ១៩៩៨ - ២០០១ ៖ លោកបានបញ្ចប់បរិញ្ញាបត្រផ្នែកច្បាប់ ហើយនៅឆ្នាំបន្តបន្ទាប់មកទៀត លោកក៏ទទួលបានអនុបណ្ឌិតផ្នែកច្បាប់នៅសាកលវិទ្យាល័យមួយ ក្នុងរាជធានីភ្នំពេញ ។
លោក ចាន់ សុវ៉េត ធ្លាប់បានទៅសិក្សាឯកទេសសិទ្ធិមនុស្ស នៅសាកលវិទ្យាល័យជូឡាឡុងកន (Chulalongkorn) ប្រទេសថៃ ។
សកម្មភាពការងារ កែប្រែ
នៅឆ្នាំ១៩៩០ ក្រោយបញ្ចប់ថ្នាក់បាក់ឌុប លោកបានសម្រេចចិត្តទៅរកការងារធ្វើនៅជាយដែនជំរំខាវអ៊ីដាង ។ បន្ទាប់មកទៀតលោកបានបម្រើការងារជាទាហានផ្នែកកាំភ្លើងធំ ប៉ុន្តែក្រោយមកគេបានចាប់លោកដាក់គុកងងឹតអស់ពេលជិតមួយឆ្នាំ ដោយសារការចោទប្រកាន់ថាលោកឲ្យកូនចៅយកអាវុធទៅលក់ឲ្យជនជាតិថៃ ។ មិនយូរប៉ុន្មាន មេបញ្ជាការក៏បានស្នើយកលោកចេញពីពន្ធនាគារវិញ ដោយសារពុំមានអ្នកចេះបញ្ជាកាំភ្លើងធំនិងគូសផែនទី ។ ដោយសារអស់កម្លាំងកាយចិត្តក្នុងការបំពេញភារកិច្ច លោកបានសម្រេចចិត្តកុហកមេបញ្ជាការ សុំមកលេងស្រុកកំណើតមុនចូលបម្រើការងារវិញ ហើយបានរត់ចោលជួរដោយពុំវិលត្រឡប់ទៅវិញឡើយ ។
លោក ចាន់ សុវ៉េត ធ្លាប់បានបម្រើការងារជាគ្រូបង្រៀននៅសាលាបង្រៀនឯកជនសំពៅមាស នៅឆ្នាំ១៩៩៣ ដល់ ១៩៩៤ ។ ក្រៅពីនេះលោកក៏បានបម្រើការងារជាមួយអ៊ុនតាក់ (អាជ្ញាធរបណ្ដោះអាសន្នអង្គការសហប្រជាជាតិ) ក្នុងនាមជាអ្នកសង្កេតការណ៍បោះឆ្នោតដែរ ។ លុះក្រោយមកនៅឆ្នាំ ១៩៩៥ ទើបលោកបានចូលបម្រើការងារនៅសមាគមអាដហុក ។
ក្នុងកំឡុងពេលការងារនៅសមាគមជាង ១៩ ឆ្នាំមកនេះ ពោលគឺមុនការទទួលមរណភាព លោកបានចូលរួមក្នុងសកម្មភាពជាច្រើន ដើម្បីជួយប្រជាពលរដ្ឋទាំងឡាយដែលទទួលរងដោយការរំលោភសិទ្ធិមនុស្ស និងរឿងអយុត្តិធម៌សង្គម ។ មជ្ឈដ្ឋានអង្គការជាតិនិងអន្តរជាតិ បានចាត់ទុកលោកជាមនុស្សសំខាន់ម្នាក់ ។ ដោយសារលោកជាអ្នករិះគន់បញ្ហានានានៅក្នុងសង្គម លោកក៏មានជាប់ករណីបណ្ដឹងនានានៅឯតុលាការដែរ ហើយលោក ចាន់ សុវ៉េត បានចូលទៅឆ្លើយបំភ្លឺនៅក្នុងតុលាការ តែតុលាការមិនបានសម្រេចឃុំខ្លួនលោកឡើយ ។ [១]
អាពាហ៍ពិពាហ៍ កែប្រែ
លោកបានរៀបអាពាហ៍ពិពាហ៍ជាមួយអ្នកស្រី ប៊ី សុភាព ។ លោក ចាន់ សុវ៉េត មានកូនចំនួនបីនាក់ក្នុងបន្ទុកគ្រួសារ ប្រុសពីរ និងស្រីម្នាក់ ។
មរណភាព កែប្រែ
លោកបានទទួលមរណភាពកាលពីថ្ងៃពុធ ទី១០ ខែធ្នូ ឆ្នាំ២០១៤ វេលាម៉ោង ១៤ និង ៥៥ នាទី នៅគេហដ្ឋានរបស់លោក ដោយសារជំងឺគាំងបេះដូង ក្នុងអាយុ ៥១ ឆ្នាំ។ លោកមានគោលបំណង ចង់ឲ្យកូនប្រុសច្បងរបស់លោកដែលទើបប្រឡងជាប់មធ្យមសិក្សាទុតិយភូមិ បានចូលបម្រើការងារនៅសារព័ត៌មានភ្នំពេញប៉ុស្តិ៍ ។[២]