បទពាក្យ៨

រង្វាស់កាព្យ

ក្នុង១វគ្គ មាន៤ឃ្លា ក្នុង១ឃ្លា មាន៨ព្យាង្គ។

ព្យាង្គ៨ ឃ្លា១ វគ្គ១ |=| ព្យាង្គ៣ ឬ ព្យាង្គ៥ ឃ្លា២ វគ្គ១
ព្យាង្គ៨ ឃ្លា២ វគ្គ១ |=| ព្យាង្គ៨ ឃ្លា៣ វគ្គ១ |=| ព្យាង្គ៣ ឬ ព្យាង្គ៥ ឃ្លា៤ វគ្គ១។

ព្យាង្គ៨ ឃ្លា៤ វគ្គ១ |=| ព្យាង្គ៨ ឃ្លា២ វគ្គ២។

បទនេះសង្កត់សំឡេងលើព្យាង្គទី៣ និងទី៥ រៀងរាល់ឃ្លា។

បទនេះគេប្រើបានគ្រប់បរិយាកាសទាំងអស់។

បទពាក្យ៨ គឺជាបទមួយដែលគេប្រើប្រាស់តាំងពីសម័យចតុមុខមកម្ល៉េះ នេះបើតាមសៀវភៅ “រៀនតែងកំណាព្យខ្មែរ” របស់លោក តឿម សុភ័ស្ត៕

រៀនរស់រៀនរករៀនរាប់រាក់ទាក់ រៀនចេះជឿជាក់រៀនជួយខ្លួនឯង

រៀនស្រាយកំហឹងរៀនកុំចំបែង រៀនខំប្រឹងប្រែងរៀនក្រែងចិត្តគេ។

រៀនរួមធ្វើការរៀនការចាត់ចែង រៀនគ្រប់កន្លែងកុំបីទំនេរ

រៀនស្អប់ពាក្យឈ្លោះតែកុំរៀនជេរ រៀនធ្វើឲ្យគេមានទំនុកចិត្ត។

រៀនចេះរាប់អានរៀនកុំរើសអើង រៀនរស់មិនឆ្មើងរៀនរស់ស្នាលស្និទ្ធ

រៀនកុំលោភលន់បំភាន់បាំងបិទ រៀនឲ្យលម្អិតរបៀបរស់នៅ។

រៀនដឹងរៀនដាស់ច្បាស់តួនាទី រៀនដើររកស៊ីរៀនចាប់គោលដៅ

រៀនធ្វើអ្នកចេះកុំស្អប់អ្នកខ្លៅ រៀនចៀសរណ្តៅអបាយតណ្ហា៕