វិទ្យាល័យបុរី១០០ខ្នង
វិទ្យាល័យហ៊ុនសែនបូរី១០០ខ្នង ចាប់ផ្តើមឆ្នាំសិក្សាដំបូងនៅថ្ងៃទី២៤ ខែកញ្ញា ឆ្នាំ១៩៨២ មានឈ្មោះថាសាលាមធ្យមសិក្សាកម្រិតទី១បូរី១០០ខ្នង ស្ថិតនៅភូមិទឹកថ្លា ឃុំទឹកថ្លា ស្រុកឬស្សីកែវ មានទំហំ ៦៦៧០ម៉ែត្រការ៉េ មានប្រជាជនរស់នៅឡូកឡំចំនួន៥គ្រួសារ មានអគារថ្ម១ខ្នង ប្រក់ស័ង្កសី៣បន្ទប់ មិនសមស្របតាមនិយាមគរុកោសល្យ ជាអតីតឃ្លាំងដាក់ចំណីសត្វ និងជាទ្រុងជ្រូកពីសង្គមចាស់។ ឆ្នាំសិក្សា១៩៨២-៨៣ សាលានេះមានគ្រូសរុបចំនួន៨នាក់ សិស្ស២២៤នាក់ ចែកជា៤ថ្នាក់ គឺថ្នាក់ទី៥ ទាំងអស់(សិស្សប្រឡងជាប់៥៥.៦៦%) ដែលកាលនោះសាលានេះដឹកនាំដោយលោកនាយក ជួង សាល់ (ជំនាន់ទី១)។
មកដល់ឆ្នាំ១៩៩២ ដឹកនាំដោយលោក អ៊ុំ មុនី (ជំនាន់ទី២) គ្រូបង្រៀនមានចំនួន២១នាក់ ស្រី១៣នាក់ សិស្ស៤៥៥នាក់ ស្រី១៨៧នាក់ ចែកជា៩ថ្នាក់ ក្នុងនោះថ្នាក់ទី៦មាន២ថ្នាក់ ទី៧មាន៣ថ្នាក់ និងទី៨ មាន៤ថ្នាក់(សិស្សប្រឡងជាប់៦៣.៣៣%)។ ដំណើរការគ្រប់គ្រង ការរៀន និងបង្រៀន១០ឆ្នាំ កន្លងមកនេះមានការបង់វិភាគទានពីមាតាបិតាសិស្ស បុណ្យផ្កាសាមគ្គី ថវិកាពីសហគមន៍ វត្តអារាម និង សប្បុរសជនផងដែរ។
.ឆ្នាំ១៩៩៨ សាលានេះត្រូវបានប្តូរឈ្មោះជា អនុវិទ្យាល័យហ៊ុនសែនបូរី១០០ខ្នង មាន អគារសិក្សា២ខ្នង ១៤បន្ទប់ ស្មើនឹង២៤ថ្នាក់ សាងសង់ថ្មីទាំងស្រុង ដោយក្រុមហ៊ុន(EVG) បន្ទាប់ពីដោះស្រាយជាមួយប្រជាពលរដ្ឋដែលរស់នៅក្នុងសាលាចំនួន៥គ្រួសាររួចរាល់នាឆ្នាំ១៩៩៧ ហើយមូលនិធិសង្គមបានកសាងអគារសិក្សាថ្ម១ខ្នង១០បន្ទប់បន្ថែមទៀតនៅឆ្នាំ២០០៣ ក្រោមការដឹកនាំរបស់លោកនាយក សែម សាវុធ (ជំនាន់ទី៣)។ សិស្សសរុបមានចំនួន១១១៨នាក់ ស្រី៥០២នាក់ ចែកជា២៤ថ្នាក់ (សិស្សប្រឡងជាប់៦២.៣៤%)។
នៅឆ្នាំ២០១០សាលានេះត្រូវបានដំឡើងជា វិទ្យាល័យហ៊ុនសែនបូរី១០០ខ្នង (ប្រកាសលេខ២៣២៦ អយក.ប្រក.ចុះថ្ងៃទី២៨ ខែមិថុនា ឆ្នាំ២០១០) ដឹកនាំដោយលោកនាយក ភោគ ផលបុណ (ជំនាន់ទី៤) ជំនួសលោកសែម សាវុធ ដែលចូលនិវត្តន៍ គឺគ្រូបង្រៀនមានចំនួន៧៤នាក់ ស្រី២៣នាក់ សិស្ស១១៤០នាក់ ស្រី៥៥៩នាក់ ចែកជា២៧ថ្នាក់ ក្នុងនោះថ្នាក់ទី៧មាន៧ថ្នាក់ ទី៨មាន៧ថ្នាក់ និងទី៩មាន៤ថ្នាក់ ។
សម្រាប់ឆ្នាំសិក្សា ២០១៦-២០១៧ វិទ្យាល័យហ៊ុនសែនបូរី១០០ខ្នង មានទីតាំង ស្ថិតនៅតាមបណ្តោយមហាវិថីសហព័ន្ធរុស្ស៊ី ក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ លើផ្ទៃដី៣៧៦៥ម៉ែត្រការ៉េ មានភូមិចំនួន១០ចំណុះឲ្យសាលា មានអគារសិក្សា២ខ្នង មាន២០បន្ទប់។ បុគ្គលិកសរុបមានចំនួន ១៣៩នាក់ ស្រី៥៥នាក់ សិស្សសរុប ២០៨៣នាក់ ស្រី១០២២នាក់ ដែលដឹកនាំដោយលោកនាយក ភោគ ផលបុណ។ នៅឆ្នាំ២០១៧សិស្សប្រឡងជាប់សញ្ញាបត្រមធ្យមសិក្សាបឋមភូមិ ៩៥.២០% និងមធ្យមសិក្សាទុតិយភូមិ ៦៦.៦៦%។
ស្ថានភាពបច្ចុប្បន្ន ២០១៧ - ២០១៨
វិទ្យាល័យហ៊ុនសែនបូរី១០០ខ្នង មានទីតាំង ស្ថិតនៅតាមបណ្តោយមហាវិថីសហព័ន្ធរុស្ស៊ី ក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ មានអគារសិក្សា៣ខ្នង អគារA មាន១០បន្ទប់(សម្រាប់ទីចាត់ការនិងរដ្ឋបាល) អគារB មានកម្ពស់៥ជាន់ ២០បន្ទប់(ជំនួយឥតសំណងពីជប៉ុនទើបសង់រួច) និងអគារC មាន១០បន្ទប់។ បុគ្គលិកសរុបមានចំនួន ១៣៩នាក់ ស្រី៥៧នាក់។ សិស្សសរុប ២១៦៦នាក់ ស្រី១០៨០នាក់ ចែកជា៤៦ថ្នាក់ ក្នុងនោះថ្នាក់ទី៧មាន៨ថ្នាក់ សិស្សសរុប៣៨៦នាក់ ស្រី១៩០នាក់ ទី៨មាន៦ថ្នាក់ សិស្សសរុប២៩០នាក់ ស្រី១២៩នាក់ និងទី៩មាន៦ថ្នាក់ សិស្សសរុប២៧៦នាក់ ស្រី១៣៤នាក់ ថ្នាក់ទី១០មាន១០ថ្នាក់ សិស្សសរុប៤៦០នាក់ ស្រី២១៩នាក់ ទី១១មាន៨ថ្នាក់ សិស្សសរុប៣៣៤នាក់ ស្រី១៨៦នាក់ និងទី១២មាន៨ថ្នាក់ សិស្សសរុប៤១០នាក់ ស្រី២២២នាក់។