ព្រែកជីកហ្វូណនតេជោ

ព្រែកជីកហ្វូណនតេជោ គឺជា ព្រែកជីកដែលមានប្រវែង ១៨០គីឡូម៉ែត្រដែលត្រូវបានស្នើឡើងក្នុងប្រទេសកម្ពុជា ដែលតភ្ជាប់ កំពង់ផែស្វយ័តភ្នំពេញ ជាមួយ ក្រុងកែប និង ឈូងសមុទ្រថៃ ។

ផ្លូវព្រែកជីកដែលត្រូវបានស្នើឡើង

ផែនទីភូមិសាស្ត្រកម្ពុជា

ព្រែកជីកនេះនឹងចាប់ផ្តើមពី ព្រែកតាកែវ នៃទន្លេមេគង្គ កាត់តាមព្រែកតាឯក នៃទន្លេបាសាក់ និងចុងក្រោយបញ្ចូលគ្នាជាមួយព្រែកតាហ៊ីងនៃទន្លេបាសាក់ក្នុងស្រុកកោះធំ។ ព្រែកជីកនេះ​នឹង​តភ្ជាប់​រាជធានី​ភ្នំពេញ​ដោយ​ផ្ទាល់​ជាមួយ​នឹង​កំពង់ផែ​សមុទ្រ​ទឹក​ជ្រៅ​តែ​មួយ​គត់​របស់​ប្រទេស​ក្នុង ​ខេត្ត​ព្រះសីហនុ និង​កំពង់ផែ​ថ្មី​ក្នុង ​ខេត្ត​កំពត ។

ផែនការ​បច្ចុប្បន្ន​រួម​មាន​ការ​សាងសង់​ទំនប់​ចំនួន​បី​ដែល​មាន​ច្រក​ទឹក និង​ស្ពាន​ចំនួន ១១។ ប្រឡាយនេះនឹងមានទទឹង ១០០ម៉ែត្រ និងជម្រៅ ៥.៤ម៉ែត្រ ដែលអាចទ្រទ្រង់នាវារហូតដល់ ៣,០០០ DWT ។ កាលបរិច្ឆេទបញ្ចប់គោលដៅគឺ ២០២៨។ វាត្រូវបានគេរំពឹងថានឹងចំណាយអស់ ១.៧ពាន់លានដុល្លារ។

គម្រោងនេះត្រូវបានផ្តល់មូលនិធិទាំងស្រុងដោយ China Bridge and Road Cooperation (CBRC) ដែលបច្ចុប្បន្ន (ខែមីនា ឆ្នាំ២០២៤) កំពុងធ្វើការលើការសិក្សាលទ្ធភាពនៃគម្រោងនេះ។ គម្រោងនេះនឹងត្រូវបានបង្កើតឡើងក្រោមកិច្ចសន្យា BOT (សាងសង់-ប្រតិបត្តិការ-ផ្ទេរ)។

បច្ចុប្បន្ន​កម្ពុជា​ពឹង​ផ្អែក​យ៉ាង​ខ្លាំង​លើ​ការ​ប្រើ​ប្រាស់​កំពង់ផែ​វៀតណាម ជាពិសេស​ កំពង់ផែកៃមែប ។ព្រែកជីកហ្វូណនតេជោថ្មី នឹងកាត់បន្ថយការពឹងផ្អែកនេះយ៉ាងខ្លាំង។ វៀតណាម ក៏​បាន​លើក​ឡើង​ពី​ការ​ព្រួយ​បារម្ភ​ខាង​បរិស្ថាន។ ការកសាងព្រែកជីកនេះត្រូវបានគេមើលឃើញពីផលប៉ះពាល់មួយចំនួនផ្នែកបរិស្ថាន និងភាពតានតឹងផ្សេងៗពីសំណាក់បណ្ដាប្រទេសជិតខាង និងក្រុមប្រឆាំងរដ្ឋាភិបាលមួយចំនួនសម្ដែងនូវភាពមិនពេញចិត្តចំពោះវត្តមាននៃព្រែកជីកនេះឡើយ។ះ

លក្ខណៈពិសេស

ព្រែកជីកនេះឆ្លងកាត់ខេត្តចំនួន ៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប តាមការប៉ាន់ស្មាន មានចំនួនប្រជាជនសរុបប្រមាណ ១លាន៦សែននាក់ រស់នៅអមសងខាងព្រែកជីកនេះ និងទទួលផលពីព្រែកជីកនេះ។ សន្ទះផ្លូវនាវាចរណ៍មាន ០៣កន្លែង ស្ពាន ១១កន្លែង ផ្លូវអមសងខាងប្រវែងសរុបប្រមាណ ២០៨គីឡូម៉ែត្រ។ ដោយគ្រោងសាងសង់ប្រើប្រាស់ពេលវេលាចំនួន ០៤ឆ្នាំ ហើយគ្រោងនឹងចាប់ផ្តើមសាងសង់ នៅចុងឆ្នាំ២០២៤។ កសាងព្រែកជីកហ្វូណនតេជោ គឺកាត់បន្ថយរយៈពេល ចម្ងាយ និងតម្លៃនៃការដឹកជញ្ជូននាពេលបច្ចុប្បន្ន ការបង្កើតតំបន់ពាណិជ្ជកម្ម និង មជ្ឈមណ្ឌលភស្តុភារកម្ម ការអភិវឌ្ឍផែរណបថ្មីៗជាច្រើន ការពង្រីកតំបន់ អភិវឌ្ឍន៍កសិកម្ម ធារាសាស្ត្រ វារីវប្បកម្ម និងចិញ្ចឹមសត្វ ការជួយគាំទ្រដល់ការអភិវឌ្ឍប៉ូល សេដ្ឋកិច្ចទី៤ របស់កម្ពុជា ការបង្កើតការងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ និងកំពង់ផែផ្សេងៗទៀត ការជំរុញការអភិវឌ្ឍទីក្រុង នគរូបនីយកម្ម និងការជំរុញការរីកចម្រើនផ្នែកអចលនទ្រព្យ។ ជុំវិញព្រែកជីកនេះផងដែរ លោកនាយករដ្ឋមន្ត្រី ហ៊ុន សែន បានបញ្ជាក់ទៀតថា ព្រែកជីកហ្វូណនតេជោ នឹងជួយបង្កើនផលត្រី និងការចិញ្ចឹមត្រីរបស់ប្រជាពលរដ្ឋ ជាពិសេសនឹងជួយរំដោះទឹកជំនន់ ពេលកម្ពុជាមានជំនន់ទឹកភ្លៀង។ បន្ថែមពីនេះ ព្រែកជីកហ្វូណនតេជោ ក៏នឹងរួមចំណែកជួយដល់វិស័យទេសចរណ៍ ហើយប្រជាពលរដ្ឋនឹងទាញបានប្រយោជន៍ ពីការធ្វើទេសចរណ៍។

ការព្រួយបារម្ភនិងសន្តិសុខ

យោងតាមគណៈកម្មាការនៅក្នុងសន្និសីទពិគ្រោះយោបល់ស្តីពីគម្រោងព្រែកជីកហ្វូណនតេជោ ដែលបានស្នើឡើងរបស់កម្ពុជាដែលបានធ្វើឡើងនៅទីក្រុងព្រែកឫស្សី (កាន់ថឺ) នៅថ្ងៃទី២៣ ខែមេសា ឆ្នាំ២០២៤ មានមតិមួយថាបរិមាណទឹកពីទន្លេមេគង្គទៅខាងលិចអាចកាត់បន្ថយបាន៥០% លទ្ធភាពនៃការជ្រៀតចូលទឹកប្រៃកាន់តែជ្រៅអាចប៉ះពាល់ដល់ផ្ទៃដីដាំដុះជាងពាក់កណ្តាលនៃដីសណ្ដទន្លេមេគង្គ ។ ឆ្លើយតបទៅនឹងកង្វល់មួយចំនួនដែលនាវាចម្បាំងចិនអាចប្រើប្រាស់ព្រែកជីកនេះ នាយករដ្ឋមន្ត្រីកម្ពុជា លោក ហ៊ុន ម៉ាណែត បានបញ្ជាក់យ៉ាងដូច្នេះថា "គម្រោងព្រែកជីកនេះ មិនបម្រើដល់ភូមិសាស្ត្រយោធារបស់ចិននោះឡើយ។ បើតាមសម្តេចធិបតី រដ្ឋធម្មនុញ្ញរបស់កម្ពុជា មិនអនុញ្ញាតឱ្យមានវត្តមានទ័ពបរទេសលើទឹកដីកម្ពុជា ហើយបន្ថែមពីលើនោះ លក្ខណៈបច្ចេកទេសព្រែកជីក ដែលមានជម្រៅទឹកត្រឹម៤ ទៅ៥ម៉ែត្រ មិនអាចឱ្យនាវាទ័ពធ្វើចរាចរណ៍បាននោះឡើយ៕"