ក្រសួងវប្បធម៌ និងវិចិត្រសិល្បៈ

ក្រសួងវប្បធម៌ និងវិចិត្រសិល្បៈ
	Ministry of Culture and Fine Arts
Agency overview
បង្កើត	១៩៩៧
ដែនសមត្ថកិច្ច	រាជរដ្ឋាភិបាលកម្ពុជា
ទីស្នាក់ការកណ្ដាល	ភ្នំពេញ, កម្ពុជា; 11°33′N 104°55′E / 11.550°N 104.917°E
បុគ្គលិក	?
រដ្ឋមន្ត្រីទទួលបន្ទុក	ហ៊ឹម ឆែម, រដ្ឋមន្ត្រីក្រសួងវប្បធម៌
គេហទំព័រ	mcfa.gov.kh

សាវតាក្រសួង

ក្រសួងវប្បធម៌និងវិចិត្រសិល្បៈ ត្រូវបានបង្កើតឡើងជាផ្លូវការនៅ ខែតុលា ឆ្នាំ១៩៩៦។ ក្រសួងវប្បធម៌ និងវិចិត្រសិល្បៈ មាន អគ្គនាយកដ្ឋានពីរ និងសាកលវិទ្យាល័យភូមិន្ទវិចិត្រសិល្បៈមួយដែលមានមហា វិទ្យាល័យក្រោមចំណុះចំនួន៥ និងមជ្ឈមណ្ឌលវិទ្យាសាស្រ្តស្រាវជ្រាវវប្បធម៌មួយ។ ក្រសួងវប្បធម៌ និងវិចិត្រសិល្បៈដឹកនាំដោយរដ្ឋមន្ត្រីមួយរូប រដ្ឋលេខាធិការប្រាំរូប និង អនុរដ្ឋលេខាធិការប្រាំពីររូប។

តាមរយៈគេហទំព័រក្រសួងវប្បធម៌ និងវិចិត្រសិល្បៈ ៖^[១]

សម័យសង្គមរាស្ត្រនិយម ៖ ការងារវប្បធម៌ ស្ថិតនៅក្រោមឱវាទក្រសួងសិក្សាធិការ (ក្រសួងអប់រំ)។
សម័យសាធារណរដ្ឋខ្មែរ ៖ ទីស្ដីការក្រសួង ត្រូវបានបង្កើតឡើង ដែលមានទីតាំងស្ថិតនៅក្នុងព្រះបរមរាជវាំង ដឹកនាំដោយ លោក អ៊ុំ សាមុត ជារដ្ឋមន្ត្រី។
សម័យសាធារណរដ្ឋប្រជាមានិតកម្ពុជា ៖ ទីស្ដីការក្រសួងត្រូវបានបង្កើតឡើងជាថ្មី ដែលមានឈ្មោះថា ក្រសួងឃោសនាការ វប្បធម៌ និងព័ត៌មាន មានទីតាំងនៅជ្រុងផ្លូវលេខ ១៨០។ ដឹកនាំដោយ សមមិត្ត កែវ ចិន្តា ជារដ្ឋមន្រ្តី។
សម័យរដ្ឋកម្ពុជា ៖ ទីស្ដីការក្រសួង មានទីតាំងនៅកន្លែងដដែល មានឈ្មោះថា ក្រសួងឃោសនាការ វប្បធម៌ ដឹកនាំដោយ សមមិត្ត ឆេង ផុន ជារដ្ឋមន្រ្តី បន្ទាប់មក លោក ហង់ ជួន ជារដ្ឋមន្ត្រី។
សម័យព្រះរាជាណាចក្រកម្ពុជា ៖

អាណត្តិទី ១ នៃរដ្ឋសភា ៖ ទីស្ដីការក្រសួង មានទីតាំងនៅដដែល មានឈ្មោះថា ក្រសួងវប្បធម៌ និង វិចិត្រសិល្បៈ ដឹកនាំដោយ ឯកឧត្តម នុត ណារ៉ាង ជារដ្ឋមន្ត្រី។
អាណត្តិទី ២ នៃរដ្ឋសភា ៖ ទីស្ដីការក្រសួង បានប្តូរទីតាំងស្ថិតនៅតាមបណ្ដោយផ្លូវព្រះនរោត្តមលេខ ២២៧ សង្កាត់ ទន្លេបាសាក់ ខណ្ឌចម្ការមន រាជធានីភ្នំពេញ ដឹកនាំដោយ សម្ដេចព្រះរៀម នរោត្តម បុប្ផាទេវី ជារដ្ឋមន្ត្រី។
អាណត្តិទី ៣ នៃរដ្ឋសភា ៖ ដឹកនាំដោយ អ្នកអង្គម្ចាស់ ស៊ីសុវត្តិ ប៉ាណារ៉ា សិរីវុឌ្ឍ ជារដ្ឋមន្ត្រី បន្ទាប់មក ឯកឧត្តមទេសរដ្ឋមន្រ្តី វ៉េង សិរីវុឌ្ឍ ជារដ្ឋមន្រ្តី។
អាណត្តិទី ៤ នៃរដ្ឋសភា ៖ ដឹកនាំដោយ ឯកឧត្តម ហ៊ឹម ឆែម ជារដ្ឋមន្ត្រី។
អាណត្តិទី ៥ នៃរដ្ឋសភា ៖ ដឹកនាំដោយ លោកជំទាវ ភឿង សកុណា ជារដ្ឋមន្ត្រី។

បេសកកម្ម

ក្រសួងវប្បធម៌និងវិចិត្រសិល្បៈត្រូវបានរាជរដ្ឋាភិបាលកម្ពុជាប្រគល់បេសកម្មឱ្យដឹកនាំ និងគ្រប់គ្រង វិស័យវប្បធម៌ និងវិចិត្រសិល្បៈនៃព្រះរាជាណាចក្រកម្ពុជា។ ក្រសួងវប្បធម៌និងវិចិត្រសិល្បៈមានមុខងារ និងភារកិច្ចដូចតទៅៈ - ប្រតិបត្តិនូវនយោបាយការពារថែរក្សា និងលើកតម្លៃបេតិកភណ្ឌវប្បធម៌ជាតិ និងសម្បត្តិវប្បធម៌ទូទៅ នៃព្រះរាជាណាចក្រកម្ពុជា គ្រប់គ្រងបណ្តារមណីយដ្ឋាន បុរាណវិទ្យា នរវិទ្យា និងប្រវត្តិវិទ្យា - ផ្តុំឡើងវិញ និងលើកតម្កើងបណ្តាតំលៃវប្បធម៌ និងជំនឿទំនៀមទំលាប់ប្រពៃណីរបស់សង្គមជាតិ បំផុសការបង្កើតស្នាដៃផ្សព្វផ្សាយ និងអភិវឌ្ឍន៍សកម្មភាពវប្បធម៌ - ជាអាណាព្យាបាលលើសាកលវិទ្យាល័យភូមិន្ទវិចិត្រសិល្បៈ ក្នុងការបណ្តុះបណ្តាលលិល្បៈករ តន្ត្រី ស្ថាបត្យករ បុរាណវិទូ និងអ្នកជំនាញផ្សេងៗទៀត ដែលសហការជាមួយក្រសួងអប់រំយុវជននិងកីឡា។

រចនាសម្ព័ន្ធ

ក្រសួងវប្បធម៌និងវិចិត្រសិល្បៈ មានរចនាសម្ព័ន្ធដូចតទៅៈ

ថ្នាក់កណ្តាល

ខុទ្ទកាល័យរដ្ឋមន្ត្រី
អធិការដ្ឋាន
នាយកដ្ឋានសវនកម្មផ្ទៃក្នុង
អគ្គនាយកដ្ឋានរដ្ឋបាល និងហិរញ្ញវត្ថុ
អគ្គនាយកដ្ឋានបច្ចេកទេសវប្បធម៌
អគ្គនាយកដ្ឋានបេតិកភណ្ឌ
សាលាមធ្យមវិចិត្រសិល្បៈ

អង្គភាពមូលដ្ឋាន

មន្ទីរវប្បធម៌ និងវិចិត្រសិល្បៈខេត្ត-ក្រុង
អធិការដ្ឋាន

គ្រឹះស្ថានសាធារាណៈ

សាកលវិទ្យាល័យភូមិន្ទវិចិត្រសិល្បៈ

អគ្គនាយកដ្ឋានបច្ចេកទេសវប្បធម៌

អគ្គនាយកដ្ឋានបច្ចេកទេសវប្បធម៌ មានមុខងារអនុវត្តនូវរាល់បេសកកម្មរបស់ក្រសួងក្នុងការប្រតិបត្តិ នយោបាយលើវិស័យ៖

បេតិកភណ្ឌ សារមន្ទីរ សិល្បៈសូនរូប សៀវភៅនិងការអាន ភាពយន្ត វីដេអូនិងពហុមេឌីយ៉ា អភិវឌ្ឍន៍វប្បធម៌ និងអប់រំសិល្បៈ។
អគ្គនាយកដ្ឋានបច្ចេកទេសវប្បធម៌ ត្រូវបានដឹកនាំដោយអគ្គនាយកមួយរូប អមដោយអគ្គនាយករង មួយចំនួន ធ្វើការតាមការចាំបាច់។

អគ្គនាយកដ្ឋានបច្ចេកទេសវប្បធម៌ មាននាយកដ្ឋានចំណុះ :

នាយកដ្ឋានអភិវឌ្ឍន៍វប្បធម៌
នាយកដ្ឋានសិល្បៈភាពយន្ត និងផ្សព្វផ្សាយវប្បធម៌
នាយកដ្ឋានសិល្បៈទស្សនីយភាព
នាយកដ្ឋានសិល្បៈសូនរូប និងសិល្បៈសិប្បកម្ម
នាយកដ្ឋានសៀវភៅ និងការអាន

នាយកដ្ឋានរដ្ឋបាលនិងហិរញ្ញវត្ថុ

នាយកដ្ឋានរដ្ឋបាលនិងហិរញ្ញវត្ថុ មានមុខងារដូចតទៅ៖

គ្រប់គ្រងការងាររួមមាន : រដ្ឋបាលបូកសរុបរបាយការណ៍ឯកសារបុគ្គលិកផែនការហិរញ្ញវត្ថុ សម្ភារ បរិក្ខារ ការងារបណ្តុះបណ្តាលក្របខ័ណ្ឌក្រសួងការងារសិក្សាស្រាវជ្រាវ និងធ្វើតល្យភាពការងារ។
សម្របសម្រួលរាល់សកម្មភាពរដ្ឋបាលនៅក្នុងក្រសួង ជាមួយបណ្តាអង្គភាពមូលដ្ឋាន ខេត្តក្រុង និងជាមួយបណ្តាក្រសួងនានា។
នាយកដ្ឋានរដ្ឋបាល និងហិរញ្ញវត្ថុ ត្រូវបានដឹកនាំដោយអគ្គនាយកមួយរូប និងអមដោយអគ្គនាយករង មួយចំនួន ជួយធ្វើការទៅតាមការចាំបាច់។

នាយកដ្ឋានរដ្ឋបាលនិងហិរញ្ញវត្ថុមាននាយកដ្ឋានចំណុះ :

នាយកដ្ឋានរដ្ឋបាលទូទៅ
នាយកដ្ឋានបុគ្គលិក
នាយកដ្ឋាននីតិកម្ម
នាយកដ្ឋានគណនេយ្យ និងហិរញ្ញវត្ថុ
នាយកដ្ឋានសំភារៈ និងបរិក្ខារ
នាយកដ្ឋានផែនការ ស្ថិតិ និងសរុប
នាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែល
នាយកដ្ឋានសហប្រតិបត្តិការវប្បធម៌អន្តរជាតិ និងកិច្ចការអាស៊ាន
សាលាបណ្តុះបណ្តាលក្របខ័ណ្ឌវប្បធម៌

សាកលវិទ្យាល័យភូមិន្ទនិងវិចិត្រសិល្បៈ

សាកលវិទ្យាល័យភូមិន្ទវិចិត្រសិល្បៈ មានមុខងាររៀបចំបណ្តុះបណ្តាលសិល្បៈករ តន្ត្រីករ ស្ថាបត្យករ បុរាណវិទូ និងជំនាញផ្សេងៗទៀត ដែលពាក់ព័ន្ធនឹងវិស័យវប្បធម៌។

សាកលវិទ្យាល័យភូមិន្ទនិងវិចិត្រសិល្បៈមានឋានៈសមមូលអគ្គនាយកដ្ឋាន។
ការរៀបចំ និងការប្រព្រឹត្តទៅនៃសាកលវិទ្យាល័យភូមិន្ទនិងវិចិត្រសិល្បៈ និងត្រូវរៀបចំដោយអនុក្រិត មួយដោយឡែក។

សាកលវិទ្យាល័យភូមិន្ទនិងវិចិត្រសិល្បៈមានមហាវិទ្យាល័យចំនួន៥ គឺ :

មហាវិទ្យាល័យស្ថាបត្យកម្ម
មហាវិទ្យាល័យបុរាណវិទ្យា
មហាវិទ្យាល័យសូនរូប
មហាវិទ្យាល័យនាដសាស្ត្រ
មហាវិទ្យាល័យតូរ្យតន្ត្រី ។

ដោយឡែកមជ្ឈមណ្ឌលស្រាវជ្រាវវិទ្យាសាស្ត្រវប្បធម៌ក៏ស្ថិតនៅក្នុងអង្គការលេខ និងរចនាសម្ព័ន្ធរបស់ សាកលវិទ្យាល័យភូមិន្ទនិងវិចិត្រសិល្បៈ។

សមាសភាពអ្នកដឹកនាំ

គោលនយោបាយ

យោងតាមកម្មវិធីនយោបាយ របស់រាជរដ្ឋាភិបាល និងផែនការយុទ្ធសាស្ត្រអភិវឌ្ឍន៍ជាតិ ឆ្នាំ២០០៦-២០១០អនុវត្តតាមផែនការសកម្មភាព ការងារវិស័យវប្បធម៌សម្រាប់នីតិកាលទី៣នៃរដ្ឋសភា ក្រសួងលើកឡើងនូវផែនការសកម្មភាពការងារវិស័យវប្បធម៌ប្រចាំឆ្នាំ ២០០៧ ដូចតទៅ ៖

គោលនយោបាយវប្បធម៌

បន្តអនុវត្តនយោបាយ អភិវឌ្ឍសង្គមវប្បធម៌សន្តិភាព

គោលបំណង

ស្រាវជ្រាវ អភិរក្ស និងអភិវឌ្ឍន៍វប្បធម៌ ដើម្បីលើកតម្កើងអត្តសញ្ញាណវប្បធម៌
បង្កើតផលប្រយោជន៍ពីសក្តានុពលភាពរបស់វប្បធម៌

គោលដៅនៃការធ្វើសកម្មភាព

ប្រែក្លាយព្រះរាជាណាចក្រកម្ពុជា ជាមជ្ឈមណ្ឌលផ្សព្វផ្សាយវប្បធម៌ជាតិ
រំលេចអត្តសញ្ញាណវប្បធម៌ជាតិ

រួមចំណែកសាងសមយុត្តិ បង្កើតការងារ និងរួមចំណែកកាត់បន្ថយ ភាពក្រីក្រក្នុងសង្គម។

ផែនការសកម្មភាព

សកម្មភាពជាអាទិភាព

ឆ្នាំ ២០០៧ ដើម្បីបន្តបំពេញតួនាទីភារកិច្ចក្នុងការអភិរក្ស និងអភិវឌ្ឍន៍ វប្បធម៌ជាតិស្របតាម [[[យុទ្ធសាស្ត្រចតុកោណ]]] របស់រាជរដ្ឋាភិបាល។ ក្រសួងមានផែនការសកម្មភាពការងារជាអាទិភាពគឺ ៖

ជួសជុសប្រាសាទព្រៃនគរក្នុង នៅខេត្តកំពង់ចាម (ទីដៅតំបន់រមណីយដ្ឋាន ប្រវត្តិសាស្ត្រ កសិទេសចរណ៍ របស់រាជរដ្ឋាភិបាល)
ជ្រើសរើសប្រាសាទមួយជួសជុល នៅតំបន់ប្រាសាទសំបូរព្រៃគុក ខេត្តកំពង់ធំ (ទីដៅតំបន់ទេសចរណ៍វប្បធម៌)
ជួសជុលប្រាសាទបន្ទាយឆ្មារ និងប្រាសាទ នៅវត្តភ្នំហាន់ជ័យ ខេត្តកំពង់ចាម
អភិវឌ្ឍន៍វប្បធម៌ជនជាតិ នៅភូមិភាគឥសាន្ត និងនៅស្រុកប្រាសាទសំបូរ ខេត្តកំពង់ធំ
ជម្រុញ និងពង្រឹងខ្នាតផលិតផលសិល្បៈសូនរូបសិប្បកម្ម នៅខេត្តពោធិ៍សាត់ និង នៅសហគមន៍ក្នុង ស្រុក ប្រាសាទសំបូរ ខេត្តកំពង់ធំ
រៀបចំកម្មវិធីសម្តែងសិល្បៈនៅរាជធានីភ្នំពេញ សំរាប់ភ្ញៀវទេសចរណ៍
អភិវឌ្ឍន៍ធនធានមនុស្ស ក្នុងបរិបទអភិវឌ្ឍន៍វប្បធម៌
បង្កើនការផ្សព្វផ្សាយ តាមរយៈ វិបសាយ (website) និង គេហទំព័រ (homepage) របស់ក្រសួង
បន្តធ្វើបញ្ជីសារពើភណ្ឌបេតិកភណ្ឌវប្បធម៌រូបី។

សកម្មភាពតាមជំនាញៈ

រៀបចំទិវាវប្បធម៌ជាតិ ៣មីនា
រៀបចំសន្និសីទ សិក្ខាសាលា បម្រើវិស័យវប្បធម៌
រៀបចំមហោស្រពៈ សិល្បៈទស្សនីយភាព សិល្បៈសូនរូប សិល្បៈភាពយន្តវីដេអូ បង្ហើរខ្លែង ម្ហូបអាហារខ្មែរ សិល្បៈថតរូប បង្ហាញម៉ូតសំលៀកបំពាក់ និងក្បាច់គុណ ។
- អភិរក្ស និងអភិវឌ្ឍន៍បេតិកភណ្ឌវប្បធម៌រូបី ៖
  - ជួសជុលគាំពារ ថែទាំ ប្រាសាទ-ស្តារស្រះបុរាណ-សំអាតបរិវេណប្រាសាទ
  - រៀបចំបង្កើតអភិរក្សដ្ឋាន និងពង្រាយមន្ត្រីអភិរក្សគ្រប់គ្រងនៅរមណីយដ្ឋាន ភ្នំព្រះរាជទ្រព្យ ប្រាសាទសំបូរព្រៃគុក ប្រាសាទព្រះខ័ន កំពង់ស្វាយ ប្រាសាទបន្ទាយឆ្មារ និង ប្រាសាទព្រះវិហារ
  - ធ្វើបញ្ជីសារពើភណ្ឌវត្ថុសិល្បៈបុរាណនៅសារមន្ទីរជាតិ និងនៅខេត្ត-ក្រុង និងនៅ អភិរក្សដ្ឋានអង្គរ
  - រៀបចំពង្រឹងសារមន្ទីរជាតិ និងកែលំអសារមន្ទីរខេត្ត-ក្រុង
  - សាងសង់សារមន្ទីរនៅខេត្តកំពង់ឆ្នាំង-កំពង់ធំ និងកំពត
  - មជ្ឈមណ្ឌលវប្បធម៌ជាតិៈ បង្កើតផ្នែកពិព័រណ៍ជាតិពន្ទុ វិចិត្រសាល-កែលំអ សារមន្ទីរខ្លែង
- អភិរក្ស និងអភិវឌ្ឍន៍បេតិកភណ្ឌអរូបី ៖
  - សិក្សាស្រាវជ្រាវ និងចងក្រងឯកសារស្តីពី កម្រងមូលដ្ឋានក្បាច់ចម្លាក់ខ្មែរ
  - សិក្សាស្រាវជ្រាវ និងចងក្រងឯកសារស្តីពីចំលាក់ និងតំបាញគ្រប់ប្រភេទ
  - សិក្សាស្រាវជ្រាវ និងចងក្រងឯកសារស្តីពីខ្នាតព្រះពុទ្ធបដិមាខ្មែរ
  - សិក្សាស្រាវជ្រាវ និងចងក្រងឯកសារស្នាដៃអ្នកនិពន្ធល្បីៗ
  - សិក្សាស្រាវជ្រាវ និងចងក្រងឯកសារស្តីពីអាពាហ៍ពិពាហ៍ខ្មែរ ការឡើងអ្នកតា និងទំនៀមទំលាប់បងប្អូន ជនជាតិភាគតិច
  - សិក្សាស្រាវជ្រាវ និងចងក្រងឯកសារស្តីពីការតម្លើងផ្ទាំងទស្សនីយភាពល្ខោន និងរបាំ ដែលកំពុងរងនូវ ការបាត់បង់ និងត្រូវទទួលរងនូវការបាត់បង់នាពេល អនាគត រៀបចំតម្លើងស្នាដៃថ្មី ៖១៤ស្នាដៃ
  - បំពាក់សំភារៈបច្ចេកទេសទំនើបសំរាប់ផលិតស្នាដៃភាពយន្ត និងវីដេអូឯកសារ
  - បំពាក់សំភារៈបច្ចេកទេសទំនើបសំរាប់ត្រួតពិនិត្យស្នាដៃភាពយន្ត និងវីដេអូ ឯកសារ
  - ផលិតខ្សែវីដេអូឯកសារវប្បធម៌ ០៥ចំណងជើង
  - វីដេអូបច្ចុប្បន្នភាព ២០ឯកសារ
  - រៀបចំបោះពុម្ព និទានុលេខ៍-ប្រតិទិន សៀវភៅប្រលោមលោក និងទស្សនាវដ្តី ៤លេខ
  - រៀបចំបង្កើតបណ្ណាល័យចល័ត រថយន្តមួយគ្រឿង
  - ជួសជុលសៀវភៅក្បួនខ្នាតចាស់ៗ
  - ដឹកនាំសិស្សចេញទៅសំដែងសិល្បៈទស្សនីយភាពតាមខេត្ត-ក្រុង។
- អភិវឌ្ឍន៍ធនធានមនុស្ស ៖
  - បើកវគ្គបណ្តុះបណ្តាលមន្ត្រីរាជការ ០៣ វគ្គ
  - អនុវត្តន៍គោលនយោបាយកំណែទម្រង់រដ្ឋបាល ដោយជ្រើសរើសធនធាន មនុស្សដែលមានសមត្ថភាព ចំណេះដឹងទទួលខុសត្រូវ ធានាការគោរពច្បាប់ ជាអ្នកទ្រទ្រង់ និងផ្តល់សេវា
  - បណ្តុះបណ្តាល បំប៉នចំណេះដឹង និងធ្វើវិក្រឹត្យការដល់មន្ត្រីដែលកំពុង បំរើការដើម្បីលើកកំពស់សមត្ថភាព ខាងផ្នែករដ្ឋបាលគ្រប់គ្រង និងជំនាញ
  - អភិវឌ្ឍន៍គុណភាពអប់រំសិស្ស នៅសាលាជាតិវិចិត្រសិល្បៈ និងនិស្សិត សកលវិទ្យាល័យភូមិន្ទវិចិត្រសិល្បៈ ឱ្យមានសមត្ថភាពកំរិតជាតិ និងអន្តរជាតិ
  - ធ្វើឱ្យសំរេចនូវការកំណត់ចំនួនមន្ត្រីរាជការតាមតម្រូវការពិតប្រាកដ និងការពង្រាយមន្ត្រីរាជការតាម សមត្ថភាពជំនាញ
  - ធ្វើឱ្យប្រសើរឡើងនូវការគ្រប់គ្រងមន្ត្រីរាជការតាមប្រព័ន្ធព៌ត័មានវិទ្យា
  - បន្តធ្វើសមាហរណកម្មមន្ត្រីរាជាការ។
- ការងារនីតិកម្ម ៖
  - កសាងច្បាប់ និងលិខិតបទដ្ឋាននានា ដើម្បីធានាដល់ការថែរក្សាការពារ សម្បត្តិបេតិកភណ្ឌវប្បធម៌រូបី អរូបី និងការគ្រប់គ្រងដឹកនាំផ្នែកឯកជន ឱ្យមានប្រសិទ្ធិភាព ក្នុងការធ្វើអាជីវកម្មលើវិស័យវប្បធម៌
  - សេចក្តីព្រាងច្បាប់ការពារចំណេះដឹងស្តីពីប្រពៃណី ទំនៀមទំលាប់
  - ធ្វើឱ្យសម្រេចអនុក្រឹត្យស្តីពីការគ្រប់គ្រងសិល្បៈទស្សនីយភាព
  - ធ្វើឱ្យសម្រេចអនុក្រឹត្យស្តីពីការគ្រប់គ្រងសិល្បៈសូនរូប សិប្បកម្ម
  - ធ្វើឱ្យសម្រេចអនុក្រឹត្យស្តីពីការបង្កើតអង្គភាពគ្រប់គ្រងសិទ្ធិរួម
  - បន្តវិសោធកម្មអនុក្រឹត្យលេខៈ៦២-ស្តីពីការប្រព្រឹត្តទៅនៃក្រសួងវប្បធម៌ និងវិចិត្រសិល្បៈ
- ការអភិវឌ្ឍន៍ស្ថាប័ន ៖
  - តំលើងអធិការដ្ឋាន ទៅជាអគ្គារធិការដ្ឋាន
  - បង្កើតនាយកដ្ឋានសិទ្ធិអ្នកនិពន្ធ
  - លើងការិយាល័យទំនាក់ទំនងវប្បធម៌អន្តជាតិទៅជានាយកដ្ឋានទំនាក់ទំនង វប្បធម៌អន្តជាតិ និងកិច្ចការ អាស៊ាន
  - បង្កើតសាលាជាតិវិចិត្រសិល្បៈថ្នាក់សមមូល នឹងនាយកដ្ឋាន
  - បង្កើតភូមិភាគវប្បធម៌
  - ធ្វើវិសោធនកម្មអនុក្រឹត្យលេខ៦៣ អនក្រ.បកស្តីពីការគ្រប់គ្រងត្រួតពិនិត្យ សិល្បៈភាពយន្ត និងវីដេអូ
  - បង្កើតការិយាល័យទំនាក់ទំនងក្រុមថតបរទេស
  - អនុវត្តនយោបាយវិសហមជ្ឈការតាមរយៈការធ្វើប្រតិភូកម្មអំណាច ពីថ្នាក់ក្រសួង ទៅឱ្យថ្នាក់ខេត្ត ស្រុក
  - បង្កើនការគ្រប់គ្រងរដ្ឋបាល និងបច្ចេកទេសវប្បធម៌តាមអង្គភាពនីមួយៗ ដើម្បីធានា ដល់ការគ្រប់គ្រង សេវាកម្មរដ្ឋបាល និងបច្ចេកទេសលើវិស័យឯកជន
- ទំនាក់ទំនងវប្បធម៌អន្តរជាតិ ៖
  - បន្តកិច្ចសហប្រតិបត្តិការលើវិស័យសិល្បៈវប្បធម៌បរទេស ពិសេសគឺសហប្រតិបត្តិការលើវិស័យវប្បធម៌ក្នុង តំបន់
  - ចូលរួមស្ថាបនាប្រព័ន្ធវប្បធម៌អាស៊ាន និងការផ្សព្វផ្សាយផ្លាស់ប្តូរចំណេះដឹង និងបទពិសោធន៍
  - ផ្លាស់ប្តូរបេសកកម្ម និងអ្នកជំនាញការលើវិស័យវប្បធម៌បរទេស
  - ស្នើសុំបញ្ជូលសម្បត្តិបេតិកភណ្ឌវប្បធម៌រូបី ជាសម្បត្តិបេតិកភណ្ឌវប្បធម៌ ពិភពលោក ប្រាសាទព្រះវិហារ
  - ស្នើសុំបញ្ជូលសម្បត្តិបេតិកភណ្ឌវប្បធម៌អរូបី ជាសម្បត្តិបេតិកភណ្ឌវប្បធម៌ នៃមនុស្សជាតិ ល្ខោនពោល ស្រី-ចាប៉ី
  - ចូលរួម និងខិតខំទាញយកផលប្រយោជន៍ពីចរន្តសាកលភាវូបនីយកម្មល្មើ វិស័យវប្បធម៌។ ការអនុវត្តន៍ ផែនការសកម្មភាពការងារប្រចាំឆ្នាំ ២០០៧ ដើម្បីឱ្យសម្រេចទទួលបានលទ្ធផលល្អ ក្រសួង ខិតខំប្រមូលប្រភពទុនគ្រប់ប្រភេទ និងធ្វើការទំនាក់ទំនងគ្រប់មជ្ឈដ្ឋាន ទាំងក្នុង និងក្រៅប្រទេសព្រមទាំងកត្តា ចម្បងត្រូវបង្កើនសមត្ថភាពធនធានមនុស្ស គួបផ្សំវិស័យច្បាប់ ដើម្បីអភិរក្ស អភិវឌ្ឍន៍វប្បធម៌ប្រកបដោយ ចីរភាព។

គន្ថនិទ្ទេស

↑ ក្រសួងវប្បធម៌ និងវិចិត្រសិល្បៈ, ១៧ មករា ២០១៤, សាវតាក្រសួងវប្បធម៌ និងវិចិត្រសិល្បៈ Archived 2020-02-21 at the វេយប៊ែខ ម៉ាស៊ីន.

តំណភ្ជាប់

ក្រសួងវប្បធម៌ និងវិចិត្រសិល្បៈ Archived 2008-07-23 at the វេយប៊ែខ ម៉ាស៊ីន.

[1] ក្រសួងវប្បធម៌ និងវិចិត្រសិល្បៈ, ១៧ មករា ២០១៤, សាវតាក្រសួងវប្បធម៌ និងវិចិត្រសិល្បៈ Archived 2020-02-21 at the វេយប៊ែខ ម៉ាស៊ីន.

[១]