ទី ជីហួត

ទី ជីហួត កើតថ្ងៃទី១០ កុម្ភៈ ១៩៥២ នៅ​ស្រុកបាទី ខេត្តតាកែវ ។ ពេលអាយុ ៦ ឆ្នាំ ឪពុករបស់លោក​បាននាំគ្រួសារមករស់នៅក្នុងភ្នំពេញ ដោយ

មានមុខរបរជាជាងកាត់សក់ ។ ឯកសារ​ខ្លះ​សរសេរ​ថា​ លោក​ទី ជីហួត កើតនៅឆ្នាំ១៩៤៩ ។ លោក​ជាអ្នកនិពន្ធរឿងប្រលោមលោកក្រោយសម័យខ្មែរក្រហមដួលរលំ ។ ស្រុកកំណើតរបស់លោកគឺនៅភូមិត្រពាំងស្លា ឃុំត្រពាំងសាប ស្រុកបាទី ខេត្តតាកែវ នៅពេលអាយុ៦ឆ្នាំ ឪពុករបស់លោកបាននាំគ្រួសារមករស់នៅក្នុងភ្នំពេញ (ទីកន្លែងដូរថ្មីដើម្បីធ្វើការនៅភ្នំពេញ គឺកើតនៅសង្កាត់លេខ៥ រាជធានីភ្នំពេញ ) ។

មុនឆ្នាំ១៩៧៥ លោកគឺជាជាងកាត់សក់ជិតផ្សារអូរឫស្សី ក្រុងភ្នំពេញ ។ នៅពេលសិក្សា ក្នុងវិទ្យាល័យ អនុវត្តដែលជាសាលាអមមហាវិទ្យាល័យគរុកោសល្យក្រុងភ្នំពេញ ។ លោកបានព្យាយាមតែងកំណាព្យនិង​បាន​ចុះផ្សាយតាមសារព័ត៌មាននានា ។ ឆ្នាំ១៩៦៩ លោកបានបញ្ចប់ការសិក្សា លោកបានចូលធ្វើជាអ្នកយកព័ត៌មាន តាមខេត្តសម្រាប់សារព័ត៌មាននៅភ្នំពេញ ។ ឆ្នាំ១៩៧១ លោកបានឈប់ធ្វើជាអ្នកយកព័ត៌មាន ហើយផ្ដើមសរសេរសៀវភៅប្រលោមលោក។

នៅពេលដែលខ្មែរក្រហមកាន់កាប់ទីក្រុងភ្នំពេញឆ្នាំ ១៩៧៥ គ្រួសាររបស់លោកត្រូវបានគេជម្លៀសទៅស្រុកខាងម្ដាយគឺនៅ ភូមិកោះតូច ឃុំតាលន់ ស្រុកស្អាង ខេត្តកណ្ដាល ។ លោក​បាន​រស់​នៅ​ទី​នោះ​បាន ៦ ខែ ខ្មែរក្រហមបានបញ្ជូនគ្រួសារលោកឲ្យទៅនៅភូមិត្រពាំងថ្ម សង្កាត់ប៉ោយចារ ស្រុកភ្នំស្រុក ខេត្តបាត់ដំបង ។

ក្រោយ​ថ្ងៃរំដោះ ៧ មករា ១៩៧៩ លោក​បាន​ចូលបម្រើរការងារ​ជាប្រធានការិយាល័យនិពន្ធសិល្បៈ និងល្ខោន​នៅនាយកដ្ឋានវិទ្យុសម្លេងប្រជាជនកម្ពុជា នៃក្រសួងឃោសនាការវប្បធម៌សាព័ត៌មាននិងកីឡា។ ចាប់ពីពេលនេះ លោកបានសរសេរសិល្បៈគ្រប់រូបភាព​ដូច​ជា​ល្ខោនបាសាក់ យឺកេ ល្ខោននិយាយ អាយ៉ៃ អាយ៉ៃឆ្លើយឆ្លង ចម្រៀងបុរាណ ចម្រៀងសម័យ ។ល។ នៅ​ឆ្នាំ ១៩៨៤ លោកបាននិពន្ធប្រលោមលោករឿង "វិលរកទ្រនំ" ។ នៅថ្ងៃទី ៣ ខែមិថុនា ឆ្នាំ ១៩៨៧ នៅរាជធានីភ្នំពេញ លោកបានទទួលមរណភាពដោយរោគគាពាធ ។

ស្នាដៃ

- ឆ្នាំ១៩៦៨ លោកបានសរសេរកំណាព្យមួយឈ្មោះថា " ក្តីលំបាកវេទនារបស់កូនអ្នកក្រនិងការបែងចែកវណ្ណៈក្នុងសង្គមមនុស្ស"

- ឆ្នាំ១៩៧០ បានបានសរសេររឿងអ្នកលេងជាយសមុទ្រ ជាប្រភេទប្រលោមលោកដោយលោកបោះផ្សាយលក់តាមទីផ្សារ ។

- ឆ្នាំ១៩៧២ សរសេររឿងគុហារថ្មលឿងជាប្រលោមលោកលោកភាគ (៥ ភាគ) បានធ្វើឲ្យគាត់ល្បីឈ្មោះ ។

- ឆ្នាំ១៩៧២ លោកបានចូលជាសមាជិកក្រុមអ្នកនិពន្ធខ្មែរ។

- ក្រោយឆ្នាំ១៩៧៩ លោកបានសរសេររឿងបាន ១៧៦ ស្នាដៃដែលក្នុងនោះមានអត្ថបទល្ខោនបាសាក់ ល្ខោនយីកេប្រលោមលោក ចម្រៀងអាយ៉ៃជាដើម ។

- ស្នាដៃចុងក្រោយរបស់លោកគឺរឿងក្បូនជីវិត (២៣-០៣-១៩៨៧)