ភិក្ខុនី
ភិក្ខុនី គឺស្ត្រីដែលបានបួសក្នុងព្រះពុទ្ធសាសនា។ ចំណែកបុរសដែលចូលបួសក្នុងព្រះពុទ្ធសាសនា ហៅថា ភិក្ខុ។ ភិក្ខុនី គឺជាអ្នកចេញចាកផ្ទះ ចូលមកបួស ហើយរស់នៅក្នុងអារាមរបស់ភិក្ខុនី ប្រតិបត្តិតាមពុទ្ធឱវាទ ដើម្បីការចេញចាកទុក្ខ។ ព្រះសម្មាសម្ពុទ្ធ ទ្រង់បានបញ្ញត្តិសិក្ខាបទ ៣១១ ដល់ភិក្ខុនី ដើម្បីសេចក្តីនៅសប្បាយដល់ពួកនាង និងដើម្បីការមិនវិវាទគ្នាក្នុងសំណាក់ឧភតោសង្ឃ គឺសង្ឃទាំងពីរចំណែក មាន ពួកភិក្ខុ និងពួកភិក្ខុនី។ សព្វថ្ងៃនេះ ភិក្ខុនីនៅក្នុងនិកាយថេរវាទមាននៅប្រទេសថៃ និងអូស្ត្រាលី ចំណែកភិក្ខុនីនៃនិកាយមហាយាន គេឃើញមាននៅប្រទេស កូរ៉េ វៀតណាម ចិន តៃវ៉ាន់ ជាដើម។
នៅក្នុងព្រះពុទ្ធសាសនា ស្ត្រី ក៏អាចសម្តេចព្រះអរហត្ត ដូចបុរសដែរ។ ដោយឃើញអំណាចប្រយោជន៍នៃបព្វជ្ជានេះ ព្រះនាងមហាបជាបតិគោតមី ដែលជាព្រះមាតុច្ឆា (ម្តាយមីង ខាងព្រះមាតា) បានសូមបព្វជ្ជា ឧប្បសម្បទា ជាភិក្ខុនីដំបូងបំផុត ក្នុងព្រះពុទ្ធសាសនា។ មុននឹងឲ្យឧបសម្បទា ដល់ពួកភិក្ខុនី ព្រះពុទ្ធជាម្ចាស់ ទ្រង់ក៏បានបញ្ញត្តនូវគរុធម៌៨ប្រការ ដល់ភិក្ខុនីផងដែរ។ ក្រោយពីបានបព្វជ្ជា ឧបសម្បទា ពួកភិក្ខុនីចំនួនច្រើន បានសម្រេចបដិសម្ភិទា មានអភិញ្ញា ហើយបានពោលនូវគាថាមួយចំនួន អំពីការត្រាស់ដឹង ដែលមានចែងក្នុងគម្ពីរ ថេរីគាថា។ ថេររីគាថា ជាផ្នែកមួយ មាននៅក្នុងខុទ្ទកនិកាយ ដែលព្រះអរហន្តទាំងឡាយ បានសង្គាយនា ចងក្រងទុករហូតមកដល់សព្វថ្ងៃ។ ព្រះគាថា ជាពាក្យកាព្យបាលី ដែលក្នុងមួយគាថា មាន៤បាទ ក្នុងមួយបាទ មាន៨ម៉ាត់។
ទោះបីជានៅក្នុងប្រទេសដែលកាន់ពុទ្ធសាសនាជាច្រើន មិនមានភិក្ខុនីទៀត តែស្ត្រីដែលមានចិត្តជ្រះថ្លា ចង់បួស អាចបួសក្នុងភាពជាដូនជី ថៃហៅថា ម៉ែជី។ នៅក្នុងប្រទេសកម្ពុជា អ្នកបួសបែបនេះ គឺមានសម្លៀកបំពាក់ស ពានាស កោរសក់ រស់នៅក្នុងវត្តអារាម។ ឯនៅក្នុងប្រទេសភូមាវិញ គេឃើញមានសម្លៀកបំពាក់ពណ៌ផ្កាឈូកស្រាល។